Sabuwar jam’iyyar haɗakar ‘yan adawa a Najeriya, ADC, ta bayyana ƙwarin damuwarta kan shirin ƙara albashin masu riƙe da mukaman siyasa a ƙasar.
Jam’iyyar ta bayyana wannan mataki da cewa “yin biris ne” ga al’ummar ƙasar, musamman a daidai lokacin da mutane ke fama da tsananin matsalolin rayuwa – daga hauhawar farashin kaya, tashin farashin mai, ƙarancin aiki, har zuwa ƙarancin mafi ƙarancin albashi.
Matsayin ADC
Ɗaya daga cikin masu magana da yawun jam’iyyar, Faisal Kabiru, ya shaida wa BBC cewa wannan mataki ya nuna rashin kula da halin da talakawan Najeriya ke ciki.
“A yau talaka ba ya iya sayen abinci ballantana magance wasu matsalolin rayuwa. Amma sai ga shi gwamnati na shirin ƙara wa ‘yan siyasa albashi, alhali suna da duk abin da suke buƙata daga alawus har zuwa biyan yawancin bukatunsu,” in ji shi.
Faisal ya ƙara da cewa:
- ‘Yan siyasa suna da dukiya, suna samun damar zuwa ƙasashen waje don neman lafiya, yayin da talaka ba ya iya zuwa asibiti.
- Yawancin jama’a ba sa iya samun abinci sau uku a rana.
- Bai kamata gwamnati ta mayar da hankali kan jin daɗin ‘yan siyasa ba, a bar talaka cikin wahala.
Rashin Sauke Nauyi
Faisal Kabiru ya jaddada cewa bai dace ba a tattauna karin albashi ga ‘yan siyasa, saboda har yanzu ba su sauke nauyin da aka dora musu ba:
“Har yanzu akwai matsalolin tsaro da yunwa a ko’ina cikin ƙasa. Don haka akan me za a ƙara musu albashi? Sam, ba su cancanci wannan kari ba.”
Ya ce wannan batu ba wai kawai na adawa ne ba, illa kawai tsari ne mara dacewa wanda ke nuna son kai.
Bayanai Daga Hukumar RMAFC
Batun ya bulla ne bayan Hukumar Raba Arzikin Ƙasa ta Najeriya (RMAFC) ta sanar da cewa tana shirin sake duba yadda ake rarraba albashi da arzikin ƙasa tsakanin matakan gwamnati – wato tarayya, jihohi da ƙananan hukumomi.
A wani taron manema labarai da aka gudanar a Abuja, shugaban hukumar, Mohammed Shehu, ya ce albashin da masu riƙe da mukaman siyasa ke karɓa bai yi yawa ba idan aka kwatanta da matsin tattalin arzikin ƙasar.
Ya bayyana cewa a yanzu:
- Shugaban ƙasa, Bola Tinubu, na karɓar Naira miliyan 1.5 a wata.
- Ministoci kuma albashinsu bai kai Naira miliyan 1 a wata ba.
