Ba ya sha’awar muƙami
Tsohon gwamnan jihar Kaduna, Malam Nasiru El-Rufa’i, ya bayyana cewa ba ya da niyyar tsayawa takara a babban zaɓen 2027.
Malam Nasiru El-Rufai ya ce dawowarsa harkokin siyasa kwanan nan ba don neman muƙami ba ne, sai dai don tallafa wa shugabanci nagari a matakai daban-daban.
Me ya sa ya dawo siyasa?
A jawabin da ya gabatar a wani taron siyasa a Kaduna ranar Laraba, ya ce:
“Asalin shirina bayan barin gwamna a 2023 shi ne na huta daga siyasa. Amma abubuwan da suka faru kwanan nan suka sa na dawo — ba don kaina ba, amma domin na bayar da goyon baya.”
El-Rufai ya ƙara da cewa ba ya da sha’awar neman wata kujera ta gwamnati.
“Ni dai ba zan sake yin gwamna ba, ba na so in je Majalisar Dattijai, ba na wata takara,” in ji shi.
Matsayinsa kan gwamnati da adawa
Tsohon gwamnan ya yi sharhi kan gwamnatin Shugaba Bola Ahmed Tinubu, inda ya bayyana cewa akwai abubuwan da ake buƙatar gyara.
ElRufai na daga cikin fitattun ‘yan siyasar Najeriya da suka yanke shawarar haɗa kai a matsayin adawa domin ƙalubalantar jam’iyyar APC mai mulki a zaɓen 2027.
Sauyin jam’iyya
A lokacin zaɓen 2023, Malam Nasiru El-Rufai ya kasance cikin manyan jiga-jigan da suka mara wa APC baya lokacin da Bola Tinubu ya yi nasara. Sai dai daga baya ya fice daga jam’iyyar, inda ya shiga jam’iyyar SDP.
Bayan haka kuma ya bayyana cewa zai kasance cikin jam’iyyar ADC, wadda a yanzu wasu manyan ‘yan adawa ke amfani da ita a matsayin lemar su.
