Hukumar EFCC reshen Kano ta cafke fitacciyar ƴar TikTok, Murja Ibrahim Kunya, bisa zargin yin liƙi da kuɗin Najeriya. Wata majiya daga hukumar ta tabbatar da kama ta ga Freedom Radio, inda aka ce ana ci gaba da bincike kan lamarin.
Rahotanni sun bayyana cewa an kama Murja ne bisa zargin take dokokin da suka shafi amfani da kuɗi a bainar jama’a. Hakan na zuwa ne bayan korafe-korafen da aka dade ana yi kan yadda wasu ƴan TikTok ke amfani da kuɗi ba tare da takamaiman tushen samun su ba.
Matakin kama ta ya janyo ce-ce-ku-ce a kafafen sada zumunta, inda wasu ke ganin cewa ya dace a binciki tushen kuɗaɗen da ake ta liƙawa. Wasu kuwa na kallon lamarin a matsayin danniya da take hakkin ƴan TikTok, musamman mata masu tashe a shafin.
A baya-bayan nan, EFCC ta kama wasu shahararrun ƴan TikTok, ciki har da Al’amin G-Fresh da Ashir Idris, bisa zargin aikata irin wannan laifi. Wannan na nuna yadda hukumar ke ƙoƙarin dakile ayyukan da ke iya sabawa dokokin kuɗi na ƙasa.
Har yanzu dai hukumar ba ta fitar da cikakken bayani kan tuhume-tuhumen da ake yi wa Murja ba. Sai dai ana sa ran za a gurfanar da ita a gaban kotu idan bincike ya tabbatar da aikata laifi.
