Hukumar Zaɓe Mai Zaman Kanta ta Najeriya (INEC) ta tabbatar da jagorancin jam’iyyar haɗaka ta ADC ƙarƙashin tsohon shugaban Majalisar Dattawa, David Mark. Wannan ya biyo bayan wallafa sunayen shugabannin jam’iyyar a shafin hukumar na intanet.
Matakin ya zo ne a daidai lokacin da gamayyar ‘yan adawar Najeriya ke ƙoƙarin “inganta jam’iyyar” domin shirye-shiryen babban zaɓen 2027.
Tun a ranar 2 ga Yuli, 2025, aka bayyana ADC a matsayin jam’iyyar da gamayyar za ta yi amfani da ita, tare da David Mark a matsayin shugaban ƙasa da kuma Rauf Aregbesola a matsayin sakataren ƙasa. Sai dai sai yanzu INEC ta tabbatar da sunayen shugabannin a hukumance.
Sauran waɗanda suka samu matsayi a cikin shugabancin jam’iyyar sun haɗa da:
- Ibrahim Ahmad Mani – Ma’aji
- Akibu Dalhatu – Sakataren Kuɗi
- Oserheimen Aigberaodion Osunbor – Mai bayar da shawara kan harkokin shari’a
‘Yan adawa suka haɗu a ƙarƙashin ADC ne domin ƙalubalantar shugaba Bola Tinubu, wanda ya hau mulki a 2023 bayan lashe zaɓen ƙasa.
Tun bayan hawansa mulki, Tinubu ya ɗauki matakai masu tasiri irin su cire tallafin man fetur da kuma sauye-sauye a fannin kuɗi — lamarin da ya sauya yanayin tattalin arzikin ƙasa.
A halin yanzu, yawancin manyan jam’iyyun Najeriya na fama da rikice-rikice na cikin gida tare da zargin jam’iyyar mai mulki APC da yi musu zagon ƙasa.
