Kotun Kano Ta Yanke Hukunci Kan Wasu Ƴan TikTok Bisa Laifin Rashin Ɗa’a
Kotun Majistiri da ke zamanta a gini mai lamba 47, unguwar Norman’s Land, ƙaramar hukumar Fagge a jihar Kano, ta yanke hukuncin ɗaurin shekara guda ko kuma biyan tara ga wasu matasa biyu masu amfani da TikTok.
Kotun ta same su da laifin wallafa bidiyoyin da suka ci karo da tarbiyya da kuma koyarwar addini a jihar Kano.
Dalilin Gurfanar da Su Gaban Kotu
Hukumar tace fina-finai ta jihar Kano ce ta kama matasan biyu, waɗanda aka bayyana sunayensu da Ahmad Isa da Maryam Musa, mazauna unguwar Ladanai a yankin Hotoro. Bayan kama su, an gurfanar da su a gaban kotu domin fuskantar tuhumar da ake yi musu.
Lauyan gwamnati, Barista Garzali Maigari Bichi, ya tuhume su da:
- Haɗa baki wajen aikata laifi.
- Wallafa saƙonnin da suka ci karo da tarbiyyar addini.
- Saba dokokin jihar Kano.
Matasan sun amsa dukkan laifukan da ake tuhumar su da su.
Hukuncin da Kotu Ta Yanke
Mai shari’a Hadiza Muhammad Hassan, wadda ta jagoranci shari’ar, ta yanke musu hukuncin ɗaurin shekara guda a gidan yari ko kuma biyan tarar Naira dubu 100 kowannensu.
Baya ga haka, kotun ta ja kunnen matasan da su kasance masu ɗa’a tare da kiyaye dokokin jihar da na addinin Islama.
🔹 Ra’ayin ku fa? Kuna ganin hukuncin ya dace? Ku bar ra’ayoyinku a ƙasa!
