Ayatullahi Tage: Rayuwarsa, Kwarewarsa da Shawararsa ga Masana’antar Kannywood
Ayatullahi Tage yana daya daga cikin fitattun jaruman Kannywood. A wata hira da yayi da DCL Hausa, ya bayyana abubuwa da dama game da rayuwarsa da kuma halin da masana’antar Kannywood ke ciki. Ya ce akwai matsaloli da ke hana ci gaba, duk da irin dimbin mutane da ke dogaro da ita don samun abinci.
Asalin Rayuwa
Ayatullahi ya ce:
“An haife ni a jihar Jigawa. Amma daga baya na dawo Kano, saboda mahaifina yana zaune a nan.”
Bayan dawowarsa Kano, abubuwa da dama suka hana shi kammala makaranta. Har makarantar sakandare bai gama ba.
Farko a Rayuwa da Sana’o’i
Ya fara da sana’o’i daban-daban kafin ya shiga harkar fim. Ya ce:
“Na fara da tallar kaset a baro. Nakan zagaya ina sayar da su. Daga nan ne na shiga harkar fim kai tsaye.”
A cewarsa, bai fuskanci wata matsala ba a shigarsa cikin fim. Saboda iyayensa sun rasu, babu wanda ya hanashi ko ya tsawata masa. Duk da haka, wasu mutane suna kallonsa a matsayin mara amfani. Amma ya dage, har Allah ya kai shi inda yake a yanzu.
Sirrin Nasara
Tage ya ce nasara tana da sirri guda uku:
- Hakuri
- Biyayya
- Aiki tukuru
“Idan kana da wadannan a zuciyarka, komai zai saukaka. Amma yanzu mutane da dama na son samun abu cikin sauki, ba tare da wahala ba.”
Ya bayyana yadda wasu ke wulakanta wadanda suka taimake su, bayan sun samu dama. Wannan hali ne da ba zai taimaka wa mutum ko masana’anta ba.
Godiya da Karamci
Tage ya nuna godiya ga Alhaji Tage, wanda ya rike shi kamar dansa. Ya ce biyayya da tawali’u ne suka kai shi ga daraja da daukaka a yanzu.
“Ina shawartar kowa ya zama mai biyayya da godiya. Kada mutum ya nuna girman kai ko kyashi. Allah ne ke bayarwa, kuma zai iya karba idan yaga dama.”
Matsalolin Kannywood
Tage ya bayyana babban kalubale a Kannywood da cewa:
“Rashin hadin kai shi ne matsalar. Babu ci gaba idan ba hadin kai. Idan muka hada kai kamar tsintsiya madaurinki daya, ba za a samu baraka ba.”
Ya kara da cewa hassada da kyashi suna hana cigaba. Wannan yasa mutane basa ba juna shawara mai amfani.
“Ina kira ga kowa da kowa a Kannywood – mu hada kai. Mu ciyar da masana’antar gaba.”
Kira ga Masu Zagin Jarumai
A karshe, Tage ya yi kira ga wadanda ke zagin jaruman fim. Ya ce:
“Ku daina. Ku ji tsoron Allah. Wata rana yaronku na iya shiga harkar fim. Idan kuka tsine yanzu, wannan tsinuwar na iya shafan ‘ya’yanku.”
Ayatullahi Tage ya nuna cewa nasara ba ta zo da sauki. Amma da hakuri, biyayya da aiki tukuru, komai zai yiwu. Haka kuma, ci gaban Kannywood yana bukatar hadin kai, mutunci da fahimtar juna.