Wani matashi daga jihar Kano, Rabi’u Halliru, ya ba da mamaki a wata sana’ar da da dama ke ɗauka da ƙasƙanci. Duk da kasancewarsa almajiri a jihar Nasarawa, Rabi’u ya ƙi rungumar bara, inda ya nemi mafita ta halaltacciyar hanya.
Ya zaɓi sana’ar yankan farce – amma ba yadda aka saba ba – ya zamanantar da ita ta hanyar shigar asibiti da amfani da kayan aikin likita.
“Na zaɓi wannan sana’ar ne saboda ba ta buƙatar kuɗi da yawa. Amma ban so in yi ta irin ta tsofaffi ba, shi ya sa na kawo salo na daban,” in ji Rabiu, wanda ke yawo daga Nasarawa zuwa Abuja don gudanar da sana’ar tasa cikin kwarjini da tsafta.
Nasara da Goyon Bayan da Ya Samu
Rayuwar Rabi’u ta canza lokacin da ya yi wa wani tsohon sanata aikin yankan farce a Nasarawa. A cikin jin daɗi da sanata ya samu, ya ɗauki nauyin karatunsa na sakandare.
A wani lokaci kuma, wata mata ta haɗa shi da mijinta wanda ya nema masa aiki a babban asibiti – duk saboda sana’ar sa.
“Idan na tuna daga inda na fito, sai kawai na ce Alhamdulillah. Ba zan taɓa mantawa da waɗanda suka taimake ni ba,” in ji Rabi’u cike da godiya da farin ciki.
Buri da Dabarar Ci gaba
Yanzu haka, Rabi’u na fatan komawa makaranta domin ya ɗora iliminsa a hukumance. Ya na kallon kayan aikin sa a matsayin matakin shiri kafin ya zama cikakken jami’in lafiya a nan gaba.
“Wasu abokaina sun taɓa dariya da shigar da nake yi. Amma ni na san inda nake dosa, kuma nasan ina neman halak,” ya bayyana da ƙwarin guiwa.
A kullum, yana iya samun fiye da ₦10,000 zuwa ₦15,000 a rana – wata shaida cewa babu abin ƙasƙanci cikin sana’ar hannu idan aka ba ta muhimmanci da tsafta.
