Yakubu Muhammad, Fitaccen Jarumin Kannywood, ya bayyana cewa zai iya auren mace irin Samira da ke cikin shirin Garwashi. Wannan bayani ya jawo ce-ce-ku-ce tsakanin masu kallo, domin mutane da dama suna ganin halayen Samira a cikin shirin a matsayin wasu da ba su dace da rayuwar aure ba. Sai dai Yakubu Muhammad ya ce a zahiri, yana kallon abubuwa daban da yadda ake kallon su a fim.
Yakubu Muhammad ya kuma yi ƙarin bayani dangane da rawar da yake takawa a cikin fina-finai masu dogon zango da yake fitowa. Wasu daga cikin waɗannan fina-finan sun haɗa da Garwashi, inda yake taka muhimmiyar rawa, da Labarina, wanda ya shahara sosai, da kuma Gidan Sarauta, fim da ke bayani kan rayuwar fada. A cewarsa, kowanne daga cikin waɗannan fina-finan yana da saƙon da yake isarwa ga masu kallo.
A cewar Yakubu Muhammad, shirin Garwashi ya na ɗauke da darussa masu muhimmanci da suka shafi rayuwar yau da kullum. Ya ce yana alfahari da rawar da yake takawa a fina-finan Kannywood, domin yana amfani da su wajen ilmantarwa da nishaɗantar da al’umma. Ya kuma gode wa masoyansa bisa goyon bayan da suke ba shi a duk fina-finan da yake fitowa.
