An shirya daura auren fitaccen mawakin siyasa Dauda Kahutu Rarara da jarumar fina-finai ta Kannywood, Aisha Humaira, a ranar Juma’a mai zuwa a birnin Maiduguri, babban birnin jihar Borno. Wannan lamari ya jawo hankalin jama’a, musamman masoya da mabiyan waɗannan taurarin biyu da suka shahara a bangarorin nishadi daban-daban.
Majiyar jarida ta bayyana cewa za a daura auren ne bayan kammala sallar Juma’a a ɗaya daga cikin manyan masallatan Maiduguri. Wata majiya da ke da kusanci da ango ta tabbatar da cewa shirye-shiryen biki sun yi nisa, kuma an gayyato baki daga sassa daban-daban na Najeriya domin halartar wannan biki mai tarihi.
Masana harkokin nishadi sun bayyana wannan aure a matsayin haɗin gwiwa tsakanin masana’antar waka da fina-finai a Arewacin Najeriya. Dauda Rarara ya shahara wajen waka musamman a fagen siyasa, yayin da Aisha Humaira ta kafa suna cikin manyan jaruman fina-finai na zamani.
Tuni masoya da mabiyan duka ɓangarorin biyu suka cika kafafen sada zumunta da fatan alheri ga ma’auratan, inda suke bayyana farin cikinsu kan wannan haɗin aure da suka ce zai iya ɗora masana’antar nishadi a sabon matsayi.
Yanzu dai idon jama’a ya koma Maiduguri domin ganin yadda za a gudanar da bikin cikin kwanciyar hankali da annashuwa. Ana sa ran wannan aure zai zama abin koyi ga sauran ’yan masana’antu, tare da ƙarfafa zumunci da haɗin kai a tsakanin su.
Ku shiga nan kuyi joining din Group din mu na Telegram 
