A ranar Laraba, wasu mazauna birnin Kano sun gudanar da zanga-zangar lumana kan zargin malamin addini Sheikh Lawan Abubakar Triumph da yin kalamai masu kausasa kan Annabi Muhammadu (SAW).
Masu zanga-zangar sun taru a farfajiyar gidan gwamnatin Kano, inda suka nemi gwamnati ta ɗauki mataki kan abin da suka kira kalaman da suka ci karo da imanin musulmi.
Dalilin Zanga-Zangar
Biyo bayan wani bidiyo da ya yadu a kafafen sada zumunta, Sheikh Lawan Abubakar Triumph ya bayyana cewa haihuwar Annabi Muhammadu da kaciya ba su zama “karama” ba saboda a cewarsa, sauran mutane ma na iya haihuwa da irin wannan yanayi.
Ya ƙara da cewa karama na nufin al’amura na musamman da Allah ya ke bai wa annabawa su kaɗai.
Malamin ya kuma bayyana cewa ruwayoyin da suka kawo labarin ba su da inganci. Wannan furuci ne da ya tayar da cece-kuce a tsakanin musulmin Kano da ma Najeriya baki ɗaya.
Martanin Masu Zanga-Zanga
Masu zanga-zangar sun ce kalaman malamin na iya jefa al’umma cikin rikici da rashin daidaito. Sun bayyana cewa babu abin da zai kwantar da hankulansu sai gwamnati ta ɗauki mataki daidai da shari’a.
A cewar shugabannin masu zanga-zangar, manufarsu ita ce kare mutuncin Annabi da kuma tabbatar da cewa babu wanda zai kuskura ya yi kalaman da za su raina al’adun musulmi.
Jawabin Gwamna Abba Kabir Yusuf
Gwamna Abba Kabir Yusuf ya tarɓi masu zanga-zangar tare da yin jawabi. Ya umarce su da su kwantar da hankali kuma su bi hanya ta doka wajen mika ƙorafinsu. Gwamnan ya ce:
“Abin da nake so shi ne ku koma ku rubuto wa gwamnati takarda, wadda ita ce za a yi amfani da ita daga nan har zuwa ƙolin ƙoli. In Allah ya yarda, za mu ɗauki matakin da bai saɓa wa Shari’a ba.”
Matakin Da Aka Shirya Dauka
Masu zanga-zangar sun amince da umarnin gwamnan, inda suka ce za su kai wa gwamnati takardar ƙorafi ta hannun ofishin sakataren gwamnati da misalin ƙarfe 10:00 na safiyar Alhamis.
Wannan mataki na nuni da cewa zanga-zangar ba ta nufin tada fitina ba, sai dai neman adalci bisa tsarin shari’a.
Zanga-zangar da aka gudanar a Kano ta sake fito da irin yadda jama’a ke da kishin kare mutuncin Annabi Muhammadu (SAW).
Duk da cewa batun ya samo asali ne daga furucin malami a cikin bidiyo, gwamnan jihar ya yi kira da a bi hanyar shari’a domin kaucewa tashin hankali.
Yanzu ana jiran ganin irin matakin da gwamnatin Kano za ta ɗauka bayan karɓar takardar ƙorafi daga masu zanga-zangar.
