Fitaccen jarumin nan da ya shahara a duniyar fina-finan Hausa, Garba Muhammad, wanda aka fi sani da Baban Ma’u a fim din Garwashi, ya bayyana wa TRT Afrika Hausa yadda tafiyarsa a masana’antar fim ta fara da ƙanana da ƙalubale.
A cewarsa, an fara saka shi a matsayin cikon benci, wato ɗan wasan da ke cike guraben da suka rage. Duk da wannan ƙaramin matsayi, ya rungumi aikin da azama da kuma kyakkyawar niyya.
Garba ya bayyana cewa juriya da himma ne suka sa ya ɗore har ya kai matsayin tauraro mai cikar kwarjini a masana’antar.
Ya ce, “Lokacin da na fara, ba kowa ne ke ganin kima a matsayi irin nawa ba, amma na ci gaba da dagewa saboda ina ganin haske a gaba.
” Wannan azama tasa ce ta kawo shi ga babban matsayin da yake kai yanzu, inda ya zama abin alfahari ga masoya fina-finan Hausa da kuma shahararre a duniya.
A yau, Garba Muhammad ya zama abin misali ga matasa masu sha’awar shiga harkar fim. Yana bai wa matasa shawarar su kasance masu gaskiya, juriya, da ƙoƙari a duk abin da suka sa gaba.
Ya ce ba kowanne mai nasara ke fara daga kololuwa ba, amma tare da dagewa da hakuri, komai zai zama mai yiwuwa.
Wannan shaidar tasa ta zama darasi mai muhimmanci ga duk masu burin samun ci gaba a rayuwa.
