Fitaccen ɗan TikTok kuma mawaƙi a Arewa, Abubakar Ibrahim, wanda aka fi sani da GFresh Al’amin, ya bayyana cewa shi ba ya jin komai a irin yadda yake gudanar da harkokinsa a kafofin sada zumunta. A cewarsa, yana nishaɗantar da kansa, yana faranta wa mutane rai, kuma yana samun kuɗi mai yawa.
Ya bayyana haka ne a hira da shirin Mahangar Zamani na BBC Hausa, inda ya zo tare da matarsa, Maryam Ahmad Yola.
Yadda Ya Fara Harkarsa
GFresh ya ce tun kafin shahararsa a TikTok, yana riga yana tallata waƙoƙinsa ta hanyar siyar da CD a titi. Da zuwan TikTok, ya ci gaba daga inda ya tsaya, inda ya mai da hankali kan yin soki-burutsu don nishaɗantar da mutane da dama.
A cewarsa, waƙar gambara ce asalinsa, amma saboda salon bai yi tasiri sosai a Arewa ba, sai ya ƙara da bidiyon barkwanci da nishaɗi da yara da manya ke kallo.
Soyayya da Aure
GFresh ya ce sun haɗu da matarsa a TikTok, inda ta bayyana masa cewa yana burgeta. Bayan tattaunawa da zumunci, sun ƙulla aure. Maryam ta bayyana shi a matsayin mutum mai haƙuri da marar fushi a gida.
Samun Kuɗi a TikTok
Mawaƙin ya ce yana samun kuɗi sosai daga TikTok, har ya kai miliyan huɗu ko sama da haka a duk wata tun bayan auren su. Kafin auren, yana samun kusan miliyan biyu a wata. Ya kuma yi nuni da cewa matarsa ta kawo masa sa’a a kasuwancinsa.
Yanayin Aiki da Iyali
GFresh ya ce yana ɗaukar bidiyo ba tare da jin kunya ba, saboda yana ganin wannan ne hanyar rufin asirinsa. Har ma ɗansa Khalid yana taimaka masa wajen ɗaukar bidiyo a wasu lokuta. Sai dai ya bayyana cewa tsiraici ne kawai bai amince ya nuna ba.
