INEC: Matakan da za ku bi don yi wa kanku rajistar zaɓe ta Intanet a Najeriya

Hukumar zaɓen Najeriya (INEC) ta sanar da fara aikin rajistar masu zaɓe a ranar Litinin, 18 ga watan Agusta. Wannan aikin yana gudana ne ta intanet kafin a fara a ofisoshin hukumar da ke faɗin ƙasar a mako mai zuwa.

INEC na yawan ba wa ’yan Najeriya damar yin rajistar zaɓe a duk lokacin da babban zaɓe ke ƙaratowa. Wannan dama ce ga waɗanda suka kai shekaru 18, ko kuma waɗanda ba su samu damar yin rajistar a baya ba, ko katinsu ya ɓace.

Aikin zai ci gaba har zuwa lokacin zaɓukan 2027. Shi ya sa aka kira shi Ci Gaba da Rajistar Masu Zaɓe (Continuous Voter Card Registration – CVR).

Hanyoyin Yin Rajistar Masu Zaɓe

INEC ta samar da hanyoyi biyu domin sauƙaƙa rajistar:

1. Ta Intanet: Ana fara rajista a shafin hukumar sannan a kammala shi a cibiyar INEC mafi kusa.
2. A Cibiyar Rajista: Ana iya zuwa kai tsaye cibiyoyin da INEC ta tanada domin yin rajistar daga farko har ƙarshe.

Sharuɗɗan Rajistar Masu Zaɓe

INEC ta lissafa wasu sharuɗɗa da duk mai son rajista dole ya bi:

• Ya kasance ɗan Najeriya da ke zaune a cikin ƙasar.
• Dole ya kai shekara 18 a ranar rajista ko kafin ranar.
• Ba shi da rajista a baya, ko katinsa ya ɓace/ya lalace.
• Ya kasance ɗan yankin ko mai aiki a kusa da cibiyar da za a yi rajistar.
• Ba shi da hukuncin kotu da ya hana shi yin zaɓe.
• Dole ya gabatar da kansa ga jami’an INEC domin tabbatar da sahihancinsa.

Yadda Ake Yin Rajista Ta Intanet

Ga matakan yin rajistar zaɓe ta yanar gizo:

1. Shiga shafin INEC: www.cvr.inecnigeria.org
2. Ƙirƙiri shafi (account) ta amfani da waya ko kwamfuta.
3. Za a aika maka da saƙon imel domin tabbatar da asusunka.
4. Cike bayananka kamar suna, jinsi, da sauran muhimman bayanai.
5. Loda hotonka a tsarin rajistar.
6. Zaɓi ranar da za ka je cibiyar INEC domin kammala rajista.
7. A cibiyar, za a ɗauki hoton yatsunka sannan a baka katin zaɓe na wucin-gadi.
8. Daga baya za ka samu katin zaɓe na dindindin.

Muhimmancin Katin Zaɓe

Katin zaɓe shi ne mabuɗin dimokraɗiyya a Najeriya.

• Da shi ake samun damar zaɓar shugabanni da wakilai.
• Tsarin mulkin ƙasa ya tabbatar wa kowa da kowa da ikon yin zaɓe.
• Katin na ba da damar sauya shugabannin da ba a gamsu da su ba.
• Haka kuma yana taimaka wajen tantance bayanan mutum a fannoni daban-daban, ciki har da mu’amala da bankuna.

👉 Yin rajistar zaɓe dama ce ga kowane ɗan Najeriya. Tabbatar ka yi rajista domin kada ka rasa damar amfani da kuri’arka a zaɓukan 2027.