Bayanai sun bayyana kan mummunan harin da ‘yan bindiga suka kai a ƙaramar hukumar Malumfashi ta jihar Katsina, wanda ya yi sanadin mutuwar kusan mutum 30 yayin da jama’a ke tsaka da sallar Asuba a wani masallaci a kauyen Gidan Mantau.
Wani mazaunin yankin ya shaida cewa:
“Muna cikin sallah suka buɗe mana wuta, mutum 28 muka yi wa jana’iza, ciki har da mahaifina. A gida suka ritsa shi, suka kulle shi a ɗaki, suka zuba masa fetur suka kunna wuta.”
Wani mazaunin daban ya ƙara da cewa maharan sun ƙona mata da ƙananan yara a cikin gidaje, tare da sace mutum kusan 100.
Shaidar Hukuma
Kakakin rundunar ƴan sandan jihar Katsina, DSP Abubakar Sadik, ya tabbatar da faruwar lamarin, yana mai cewa:
“Bayan mutum 15 da suka mutu, akwai kuma bakwai da suka ji rauni, sannan sun kunna gidaje da dama da wuta.”
Ya bayyana cewa jami’an tsaro sun ɗauki matakai na gaggawa don dawo da zaman lafiya, amma har yanzu ba a samu nasarar kama kowa ba.
Halin Mazauna Yankin
Mazauna kauyen sun ce akwai mutum biyar da ke kwance a asibiti, yayin da sauran jama’a ke cikin firgici da tashin hankali.
“Ɓarayin nan an san su, an kuma san inda suke, amma duk da haka ba a fasa aikinsu,” in ji wani mazaunin cikin ƙunci.
Karin Hare-hare a Malumfashi
A ranar Alhamis da ta gabata, rahotanni sun nuna cewa wasu ‘yan bindiga sun kashe wani jami’in ƙaramar hukumar Malumfashi a gonarsa, tare da yin garkuwa da tsohon kansila. Baya ga haka, sun kuma kai hari garuruwan Gidan Boro, Tuge, da Dayi da misalin ƙarfe 8:00 na dare.
